ഉത്തരം

ഭൂഗർഭത്തിലേക്ക് പുറപ്പെട്ടാൽ 
ഞാനെൻറെ ലക്ഷ്യമെത്തിയേനെ,
സ്വമനസ്സിലേക്കൂളിയിട്ടപ്പോൾ 
വഴിയപ്പാടെ തെറ്റി പക്ഷെ !
ഓരോ വട്ടവും അപരിചിതമാമോരോ
കോണിലുമന്യയാം എന്നെ കണ്ടു...
സർവ്വദിശകളിലും ഭയ വിഹ്വലയായ്
സൂക്ഷ്‌മമായി വീക്ഷിച്ചുവെന്നാലും...
പേർത്തുമീ മനസ്സിന്റെയിരുളിൽ 
സ്വയം അന്യയായ് തീരുന്നുവിന്നും...
എന്നിലെ വൈരുദ്ധ്യങ്ങൾ 
ഭയപ്പെടുത്തുന്ന സ്ഫോടനങ്ങൾ,
എന്റെ ഇന്ദ്രിയങ്ങൾ പൊട്ടിത്തെറിക്കുന്നു;
വിഘടിച്ച എന്റെ ദേഹം 
ഞാൻ കാമിച്ച ദേഹങ്ങളെ തേടും,
ചീറ്റിത്തെറിക്കുന്ന രക്തമിതാ 
തീവ്രമായി ഞാൻ സ്നേഹിച്ചവരെ 
തേടിയൊഴുകുന്നു...
എന്റെ ദേഹി മാത്രം 
ആരെ തേടണമെന്നറിയാതെ,
ആരെ സ്നേഹിക്കണമെന്നറിയാതെ,
ഏകാന്തമായ്...
വ്യഥയോടെ...
ഉത്തരമറിയാതെന്നിലെക്കുള്ള 
യാത്ര തുടരും...